Sulmuesi suedez ka tronditur Newcastle duke informuar klubin se dëshiron të largohet. Sipas Daily Mail, ky vendim vjen si pasojë e dështimit të Newcastle për të përmbushur premtimin për një kontratë të re verën e kaluar. Isak u sigurua nga ish-pronarët e klubit, Amanda Staveley dhe Mehrdad Ghodoussi në mars 2024 se një marrëveshje më e mirë ishte në proces por ajo nuk u realizua. Pas largimit të tyre nga klubi katër muaj më vonë, Paul Mitchell u emërua si drejtor sportiv. Mitchell e pa se Isak ishte tashmë një nga lojtarët më të paguar të klubit dhe kishte ende katër vjet të mbetur në kontratë, ndaj nuk pranoi të ofronte kushtet që kërkonte sulmuesi. Ky vendim thuhet të ketë lënë Isak "të zemëruar" me klubin.
Trajneri i Newcastle, Eddie Howe ka shprehur shpresën se sulmuesi Alexander Isak do të qëndrojë te klubi, por ka pranuar se të ardhmen e tij te Magpies është të pasigurt. Isak ka informuar klubin se dëshiron të eksplorojë mundësitë e tij këtë verë dhe ai nuk do të marrë pjesë në turneun paraprak të sezonit në Singapor, për shkak të një dëmtimi të lehtë në kofshë.
Megjithatë, deri tani nuk ka pasur një kërkesë formale për transferim dhe ndërkohë që janë zhvilluar bisedime për një kontratë të re me Newcastle gjatë muajve të fundit nuk është arritur ende një marrëveshje.
Liverpool ka shprehur interes për Isak pavarësisht se ka nënshkruar tashmë përforcimin e sulmit, Hugo Ekitike për një shumë prej 79 milionë funte këtë verë.
Isak ka ende tre vjet të mbetur në kontratën e tij me Newcastle, dhe klubi ka vendosur një vlerësim prej 150 milionë funte për sulmuesin suedez. Eddie Howe ka theksuar se shpreson që Isak të kthehet shpejt dhe të vazhdojë të luajë për Newcastle, duke e dëshiruar atë në fushë me fanellën e bardhë e të zezë.
"Është duke u vlerësuar dëmtimi i tij në Newcastle. Shpresoj që të kthehet shpejt dhe të luajë përsëri për ne sepse kjo është ajo që duam të shohim," tha Howe në konferencën për shtyp para miqësores me Arsenalin të dielën.
Komente