Korriku i këtij viti shënoi temperaturat më të larta në historinë moderne duke u renditur i treti për nga nxehtësia, sipas një raporti nga Agjencia e Shërbimit të Ndryshimeve Klimatike Copernicus të Bashkimit Europian. Pavarësisht një temperature mesatare pak më të ulët, shkencëtarët theksuan se ekstreme të tilla si valë të nxehti dhe përmbytje vdekjeprurëse vazhduan të ndikojnë në shumë rajone të botës.
"Dy vjet pas korrikut më të nxehtë të regjistruar, seria e rekordëve të temperaturës globale ka përfunduar – për tani. Por kjo nuk do të thotë se ndryshimi klimatik ka ndaluar," tha Carlo Buontempo, drejtor i Shërbimit të Ndryshimeve Klimatike Copernicus. "Ne vazhduam të jemi dëshmitarë të pasojave të një bote që po vijon të ngrohet."
Raporti i Agjencisë Copernicus zbuloi se edhe pse korriku 2025 nuk arriti nivelet ekstreme të korrikëve të viteve 2023 dhe 2024, ai ishte ende 1.25 gradë Celsius më i ngrohtë sesa periudha para-industriale (1850-1900), kur njerëzit filluan përdorimin masiv të karburanteve fosile.
Temperatura mesatare globale e sipërfaqes arriti në 16.68 gradë Celsius, që është 0.45 gradë më shumë se mesatarja e periudhës 1991-2020. Gazi i shkaktuar nga djegia e karburanteve fosile, si benzina, nafta dhe qymyri, mbetet shkaku kryesor i ndryshimeve klimatike.
Pavarësisht temperaturave të ulura gjatë korrikut, periudha 12-mujore midis gushtit 2024 dhe korrikut 2025 ishte 1.53 gradë më e ngrohtë se periudha para-industriale, duke kaluar kufirin prej 1.5 gradësh të caktuar në vitin 2015 për të kufizuar ngrohjen e shkaktuar nga njeriu.
Shkencëtarët e Copernicus theksuan se, nëse nuk reduktohen ndotësit e gazrave serë, mund të presim më shumë rekorde të temperaturave dhe ngjarje ekstreme klimatike. Një shembull i kësaj ishte rekordi i temperaturës më të lartë të regjistruar në Turqi, ku më 25 korrik u arrit 50.5 gradë Celsius gjatë periudhës së zjarreve të egra.
Komente