Një aksion i papritur është zhvilluar mesditën e sotme (2 korrik) në zyrat qëndrore të kompanisë “Bankers Petroleum” në Fier, e cila operon prej vitesh në fushën e nxjerrjes së naftës në zonën e Marinzës.
Disa automjete luksoze me targa shqiptare dhe të huaja u panë të parkuara jashtë godinës, ndërsa brenda ambienteve të rrethimit ndodhej një furgon i Drejtorisë së Përgjithshme të Tatimeve, shoqëruar nga efektivë të Policisë së Shtetit.
Burime konfidenciale bëjnë me dije për BluTV se kontrolli dyshohet të jetë i lidhur me detyrime të papaguara nga kompania ndaj shtetit, ndërsa deri më tani nuk ka asnjë deklaratë zyrtare nga autoritetet apo vetë kompania për arsyet e ndërhyrjes.
“Bankers Petroleum” është përballur më parë me akuza nga Drejtoria e Tatimeve për moslikuidimin e detyrimeve fiskale, ndaj si administratës tatimore ashtu edhe asaj doganore.
Kompania është kritikuar vazhdimisht edhe për ndikimin negativ në mjedis, përfshirë ndotjen e ajrit dhe tokës si pasojë e aktivitetit të saj naftënxjerrës në zonën e Marinzës – një shqetësim i përsëritur nga komuniteti dhe organizatat mjedisore lokale.
BluTV do të vijojë të ndjekë zhvillimet dhe do të sjellë të rejat më të fundit mbi këtë çështje.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente