Brooklyn Beckham ka bërë publike një seri deklaratash ku akuzon prindërit e tij për keqtrajtim dhe ndërhyrje të vazhdueshme në jetën personale, duke njoftuar se ka ndërprerë çdo përpjekje për pajtim me familjen.
Në mesazhet e shpërndara në rrjete sociale, ai shprehet se për herë të parë po jeton sipas zgjedhjeve të tij, duke mohuar se bashkëshortja e tij, Nicola Peltz, ushtron kontroll mbi të. Përkundrazi, Brooklyn deklaron se ka qenë vetë nën kontrollin e prindërve për shumicën e jetës së tij, gjë që, sipas tij, i ka shkaktuar stres dhe ankth të vazhdueshëm.
Ai rrëfen se marrëdhënia me familjen u përkeqësua ndjeshëm gjatë dasmës së tij, kur, sipas deklaratës, u bënë komente që e përjashtonin gruan e tij nga familja. Ky episod, sipas tij, ishte momenti që e çoi drejt vendimit për t’u shkëputur.
Brooklyn ka kritikuar gjithashtu ndryshimin e planit për fustanin e nusërisë së Nicola-s, i cili, sipas tij, u anulua në momentet e fundit. Ai ka përmendur edhe presionin për të nënshkruar një marrëveshje që do t’i hiqte të drejtat mbi emrin “Beckham”, duke e lidhur këtë me përpjekjet për të ruajtur imazhin publik të familjes.
Në deklaratën e tij përfshihen edhe akuza për ndërhyrje në marrëdhëniet e tij të mëparshme dhe për mungesë gatishmërie nga ana e babait të tij për të kaluar kohë me të dhe bashkëshorten, përveçse në kushte të caktuara.
Në fund, Brooklyn thekson se ai dhe Nicola kanë zgjedhur një jetë të larguar nga presioni i imazhit publik dhe ndërhyrjet familjare, duke synuar privatësi, paqe dhe stabilitet. Ai shprehet se largimi nga familja i ka sjellë qetësi dhe një ndjenjë lehtësimi që nuk e kishte përjetuar më parë.
Komente