Në qytetin e Sarandës ka filluar një projekt i rëndësishëm për rinovimin e kopshteve dhe çerdheve, të cilat do të përfitojnë nga investime publike të konsiderueshme. Bashkia e Sarandës ka nisur ndërhyrjet për përmirësimin e kushteve dhe krijimin e një ambienti të përshtatshëm për edukimin e fëmijëve, duke u fokusuar në dy aspekte kryesore: rinovimin e ndërtesave dhe përmirësimin e kushteve për mësim dhe lojë.
Punimet kanë nisur nga Kopshti Nr. 1, kopshti më i vjetër i qytetit, ku pritet të përfundojnë gjatë muajve të verës. Kjo do t’i mundësojë institucioneve që të jenë gati për vitin e ri shkollor me kushte bashkëkohore, si në mjediset e brendshme ashtu edhe ato të jashtme.
Për këtë transformim të rëndësishëm, janë destinuar 29 milionë lekë (pa TVSH), që do të përdoren për rinovimin e sistemeve hidraulike, elektrike dhe të kondicionimit. Po ashtu, hapësirat e jashtme do të pajisen me lodra mbi tapet plastik dhe do të krijohen mundësi për shfaqje teatrore dhe aktivitete rekreative për fëmijët.
Investime në çdo lagje të qytetit
Në të njëjtën kohë, Bashkia e Sarandës ka nisur ndërhyrje edhe në kopshte dhe çerdhe të tjera në lagje të ndryshme të qytetit. Këto institucione do të kenë fasada të reja me sistem kapot ndërkohë që mjediset e brendshme do të pajisen me orendi dhe pajisje të reja, të përshtatshme për edukimin parashkollor.
Ky projekt ka për qëllim përmirësimin e kushteve për fëmijët dhe edukatorët, duke krijuar një mjedis të sigurt dhe modern për zhvillimin e fëmijëve në vitet e para të jetës.
Komente