Historia e dhimbshme e Bekimit nga Thethi

Gazment Bardhi reagon për masakrën në veri: “Edi Rama, i fortë me të dobëtit dhe i dobët me të fortët!”

Kryetari i grupit parlamentar të Partisë Demokratike, Gazment Bardhi, ka reaguar pas aksionit të Policisë së Shtetit dhe Inspektoratit Kombëtar të Mbrojtjes së Territorit (IKMT) në fshatin turistik Theth, ku u ndërmor shembja e disa ndërtimeve pa leje – kryesisht bujtina dhe shtëpiza pushimi të ndërtuara nga banorët vendas.

Në qendër të reagimit të Bardhit është historia prekëse e Bekimit, një banor i fshatit Hot i Ri në Shkodër, i cili humbi pjesë të trupit në një fatkeqësi që në vegjëli dhe që investoi të gjitha kursimet dhe një kredi bankare për të ndërtuar 5 shtëpiza druri në tokën e të parëve të tij në Theth.

Dhimbja e Bekimit dhe premtimet e pambajtura
Bekimi humbi dy këmbët, njërën dorë dhe pësoi djegie të thella në fytyrë në një zjarr që i mori jetën familjes, por ai u rrit me guxim dhe dashuri nga komuniteti. Me shumë mund dhe shpresë, ai ndërtoi shtëpizat që sot janë në planin e IKMT-së për shembje, për shkak të mungesës së lejes së ndërtimit.

Gazment Bardhi risjell në vëmendje premtimin e kryeministrit Rama më 30 prill 2024, i cili kishte deklaruar se problemi i certifikatave të pronësisë për banorët e Thethit do të zgjidhej brenda dy muajsh, por sot, forcat shtetërore po shkatërrojnë investimet modeste të njerëzve të thjeshtë.

Reagimi i Bardhit: “I fortë me të dobëtit, i dobët me oligarkët”
“Në bregdet dhe në Tiranë ngrihen dhjetëra kate kullash, vila dhe resorte pa leje nga oligarkët, ndërsa Edi Rama zgjedh të merret me shtëpizat e Bekimit, të ndërtuara në tokën e trashëguar të të parëve të tij. Ky është arbitrariteti i qeverisë, që nuk ka guxim të përballet me të fortët, por përdor gjithë forcën ndaj të dobëtëve,” thekson Bardhi.

Ai thekson se ndryshimet e fundit ligjore për zonat e mbrojtura po lejojnë grabitjen e pronave për ndërtimin e resorteve luksoze në zemër të Parkut Kombëtar të Thethit, duke dëmtuar komunitetin dhe trashëgiminë kulturore të zonës.

Apeli për drejtësi dhe ndihmë
Gazment Bardhi i bën thirrje kryeministrit Edi Rama dhe kryebashkiakut Benet Beci që të ndalojnë shembjet dhe të largojnë forcat e policisë e fadromat, duke lejuar Bekimin dhe banorët e Thethit të ruajnë dhe përfitojnë nga mundi dhe kursimet e tyre.

“Njerëz si Bekimi duhen mbështetur, jo dënuar. Ata janë shembuj guximi dhe forcë për komunitetin dhe duhet trajtuar me drejtësi dhe respekt.”