HIMARË – Sezoni turistik në bregdetin e Himarës ka nisur me një rritje të dukshme të hapësirave publike për pushuesit, të cilat janë mirëpritur nga vizitorët, por ende kërkohet më shumë vëmendje për pastrimin dhe sigurinë në plazhe.
Pushuesit që kanë zgjedhur plazhet publike të Himarës këtë vit shprehen të kënaqur me zgjerimin e hapësirave të lira, duke theksuar se krahasuar me vitet e kaluara, kanë më shumë akses dhe rehati. Megjithatë, mungesa e vrojtuesve të plazhit dhe problemet me pastërtinë janë ndër shqetësimet kryesore të ngritura.
“Ka më shumë vend këtë vit dhe është diçka shumë pozitive, por duhen më shumë vrojtues dhe më shumë pastërti,” shprehen disa prej pushuesve.
102 plazhe publike, 2 menaxhohen nga Bashkia
Sipas të dhënave zyrtare nga Bashkia Himarë, në të gjithë vijën bregdetare të qytetit numërohen 296 plazhe, nga të cilat 102 janë shpallur plazhe publike, ndërsa 2 prej tyre do të menaxhohen drejtpërdrejt nga vetë Bashkia.
Kjo masë synon të përmirësojë aksesin e qytetarëve dhe turistëve në plazhet e lira, duke balancuar ofertën turistike mes hapësirave të menaxhuara dhe atyre të lira për publikun.
Thirrje për më shumë investim në siguri dhe higjienë
Me rritjen e numrit të pushuesve, prania e vrojtuesve të plazhit dhe menaxhimi i pastërtisë mbeten prioritete që kërkojnë ndërhyrje të menjëhershme për të garantuar një sezon sa më të sigurt dhe të këndshëm për të gjithë vizitorët.
Komente