Policia e Vlorës ka vënë në pranga një 36-vjeçar nga Tirana, i cili u kap në flagrancë me lëndë narkotike të ndara në doza, gati për shitje, në zonën turistike të Jalës, në Himarë.
Operacioni u zhvillua në kuadër të kontrolleve intensive në zonat bregdetare, pjesë e planit të masave për parandalimin dhe goditjen e veprimtarive kriminale gjatë sezonit veror. Shtetasi H. M., 36 vjeç, u ndalua nga specialistët për Hetimin e Narkotikëve të DVP Vlorë në bashkëpunim me Komisariatin e Policisë Himarë.
Gjatë kontrollit fizik dhe atij në ambientet ku ishte akomoduar, policia gjeti dhe sekuestroi në cilësinë e provës materiale doza me lëndë të dyshuara narkotike, përkatësisht kokainë, MDMA dhe kanabis.
Materialet procedurale i janë referuar Prokurorisë pranë Gjykatës së Vlorës, ndërsa i arrestuari do të hetohet për veprën penale “Prodhimi dhe shitja e narkotikëve”. Policia bën me dije se kontrollet do të vijojnë edhe në ditët në vijim, veçanërisht në zonat me fluks të lartë turistik.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente