Gushti Sjell Rritje të Vizitave për Virozat Stinore në Vlorë

Muaji gusht ka shënuar një rritje të ndjeshme të numrit të vizitave mjekësore, kryesisht për shkak të virozave stinore, si ato gastrointestinale që përfshijnë diarrenë dhe të vjellat. Sipas të dhënave të fundit, Vlora ka pasur një fluks të shtuar të qytetarëve dhe pushuesve që kërkojnë ndihmë mjekësore, me një numër javor vizitash që ka arritur deri në 1200 krahasuar me rreth 700 vizita në periudhat normale.

Shefi i Epidemiologjisë në Vlorë, Agron Bashllari ka konfirmuar se mesi i muajit gusht shënon kulmin e vizitave javore, me një rritje të konsiderueshme të rasteve që kërkojnë trajtim. Ai shtoi se, në javën e kaluar, janë regjistruar rreth 900 vizita me spitalin që mban peshën kryesore të trajtimit.

"Rritja e vizitave lidhet drejtpërdrejt me fluksin e lartë të vizitorëve dhe pushuesve në këtë periudhë. Vlerësojmë se, përveç virozave gastrointestinale të cilat janë më të shpeshta në këtë periudhë, ka një rritje të kërkesës për ndihmë mjekësore, sidomos për moshat pediatrike, të cilat janë më të prekurat," – tha Bashllari.

Ai theksoi gjithashtu rëndësinë e kujdesit ndaj higjenës dhe konsumit të ushqimeve të sigurta duke paralajmëruar se duhet të jepet më shumë vëmendje për të shmangur përhapjen e virozave mes qytetarëve dhe pushuesve.

"Kujdesi i shtuar për higjenën dhe ushqimin është thelbësor për të parandaluar komplikimet shëndetësore," – shtoi Bashllari.

Për momentin, virozat gastrointestinale janë të pranishme më shpesh por sipas specialistëve, Gushti mbetet edhe periudha më problematike për përhapjen e virozave si pasojë e fluksit të lartë të popullsisë në qytet.