Ekspertët e shëndetësisë në Shtetet e Bashkuara kanë ngritur alarmin për një shpërthim të ri të gripit të shpendëve (H5N1), një virus shumë ngjitës që po përhapet me shpejtësi në prag të sezonit të festave. Autoritetet paralajmërojnë se rritja e rasteve po paraqet rrezik për sigurinë ushqimore dhe mund të shkaktojë mungesa të produkteve të shpendëve, përfshirë gjelat e detit që janë pjesë tradicionale e festës së Ditës së Falënderimeve.
Sipas të dhënave të Departamentit Amerikan të Bujqësisë (USDA), virusi është konfirmuar në 33 shtete gjatë 30 ditëve të fundit, duke prekur rreth 7 milionë shpendë, përfshirë 1.3 milionë gjela deti. Michigan rezulton shteti më i prekur me 54 tufa zogjsh të egër, ndjekur nga Minnesota, Colorado dhe Kansas. Përveç shpendëve, shpërthime të izoluara janë raportuar edhe në tufa lopësh qumështore në Idaho, Nebraska dhe Teksas.
Që nga viti i kaluar, virusi ka infektuar 70 persona dhe ka shkaktuar një viktimë – një person mbi 65 vjeç me sëmundje të mëparshme kronike. Ekspertët theksojnë se shumica e rasteve njerëzore janë regjistruar tek punëtorët e fermave që kanë pasur kontakt të drejtpërdrejtë me kafshë të infektuara, megjithëse është dokumentuar edhe një rast i izoluar infektimi pa kontakt të njohur me kafshë, që mbetet i paqartë.
Qendrat për Kontrollin dhe Parandalimin e Sëmundjeve (CDC) kanë sqaruar se aktualisht nuk ka prova për transmetim të virusit nga njeriu te njeriu, por kanë theksuar se nevojitet vigjilencë e lartë, sidomos për punëtorët e bujqësisë dhe konsumatorët që përpunojnë produkte shtazore. CDC paralajmëron se simptomat e infektimit përfshijnë skuqje të syve, ethe, kollë, dhimbje fyti, lodhje, dhimbje muskujsh dhe në raste të rënda pneumoni apo dështim respirator.
Në planin ekonomik, pasojat tashmë janë të dukshme. Sipas ekonomistit Bernt Nelson nga Federata Amerikane e Byrosë së Fermave, çmimet me shumicë të gjelave të detit janë rritur me rreth 40 për qind krahasuar me një vit më parë. “Fermerët tanë po e përjetojnë shumë rëndë këtë sezon,” deklaroi Nelson.
USDA ka njoftuar përdorimin e fondeve emergjente për monitorimin dhe kontrollin e virusit, veçanërisht pas mbylljes së përkohshme të qeverisë, e cila ka vonuar raportimin e të dhënave të reja. Ndërkohë, disa punonjës “thelbësorë” të CDC-së janë mbajtur në detyrë për të garantuar reagimin ndaj emergjencave shëndetësore.
Eksperti i gripit Richard Webby, nga Spitali Kërkimor i Fëmijëve “St. Jude”, tha se virusi H5N1 është futur tashmë në një model sezonal dhe se kjo pritet të bëhet “norma e re” në Amerikën e Veriut.
Ndërkohë, autoritetet kujtojnë se rreziku për konsumatorët mund të reduktohet ndjeshëm përmes gatimit të duhur të mishit dhe pasterizimit të produkteve të qumështit, pasi temperatura e lartë shkatërron virusin. USDA rekomandon që mishi i pulës dhe i gjelit të detit të gatuhet deri në 165°F (rreth 74°C) për të eliminuar çdo rrezik infektimi nga gripi i shpendëve, salmonela apo E. coli.
Komente