Greqia po përgatitet për një valë të nxehti ekstrem që pritet të mbajë temperaturat mbi 40 gradë Celsius deri të premten e ardhshme. Sipas meteorologëve disa zona mund të përjetojnë temperaturat deri në 43-44 gradë Celsius.
Kryetari i kërkimeve të Observatorit Kombëtar të Athinës (NOA), Kostas Lagouvardos shpjegoi për agjencinë greke të lajmeve ANA se vala e temperaturave të larta ka filluar javën e kaluar me nivele që arritën deri në 37°C. Faza më e nxehtë e valës do të zgjatët për rreth gjashtë ditë, me një rënie të ngadaltë të temperaturave që pritet të ndodhë më 29 korrik.
Sipas Lagouvardos, ditët më të nxehta priten të jenë e martë, e mërkurë dhe e enjte, me mundësi që temperatura të arrijë në nivele ekstreme në disa zona. Këto temperatura do të jenë të pranishme kryesisht në Thesali, Maqedoninë Qendrore, Traki, Peloponez dhe disa pjesë të Greqisë Qendrore, përfshirë Atikën.
Një tjetër shqetësim është niveli i lartë i temperaturave gjatë natës, që do të shkaktojë një stres të shtuar nga nxehtësia. Meteorologu i NOA-s, Stravros Dafis, konfirmoi gjithashtu se temperatura do të kalojë 40°C edhe në lartësi deri në 800 metra mbi nivelin e detit dhe do të jetë rreth 35°C në zona më të larta.
Profesorja Klea Katsougianni, e Universitetit Kombëtar dhe Kapodistrian të Athinës, vuri në dukje se këto temperatura të larta mund të shkaktojnë rritje të shkallës së vdekshmërisë, duke theksuar se qytetet si Athina janë të rrezikuara nga ndikimi i ndryshimeve klimatike në shëndetin publik.
Në përfundim, ekspertët paralajmërojnë se, nëse nuk merren masa për të përballuar ndryshimet klimatike, mund të kemi pasoja serioze për shëndetin dhe sigurinë e qytetarëve, duke shtuar nevojën për ndërhyrje urgjente në mbrojtje të jetës njerëzore.
Greqia është në gatishmëri për të adresuar këtë situatë dhe po merr masa për të mbrojtur qytetarët nga rreziku i temperaturave të larta.
Komente