Të paktën 95 palestinezë kanë humbur jetën gjatë 24 orëve të fundit si pasojë e sulmeve izraelite në Rripin e Gazës, sipas burimeve mjekësore lokale. Viktimat përfshijnë dhjetëra civilë që po qëndronin në qendrat e shpërndarjes së ndihmave humanitare, ku kishin shkuar për të kërkuar ushqim.
Ndër ngjarjet më të rënda, një avion luftarak izraelit ka bombarduar një internet-kafe në të cilën po zhvillohej një festë ditëlindjeje për një fëmijë, duke shkaktuar 39 viktima, shumë prej të cilëve gra dhe fëmijë. Sipas burimeve mjekësore, objekti përdorej si vendstrehim nga të zhvendosurit, por edhe nga gazetarë dhe aktivistë, për shkak të mundësisë për të pasur akses në internet.
Ndërkohë, Hamasi ka akuzuar Izraelin për pengimin e përpjekjeve për një armëpushim, në një kohë kur bilanci i viktimave civile vazhdon të rëndohet nga dita në ditë.
Situata humanitare në Gaza vijon të përkeqësohet mes bombardimeve të pandërprera, mungesës së ndihmës dhe dëshpërimit të mijëra të zhvendosurve që kërkojnë mbrojtje e furnizime jetike. BluTV do të vijojë të raportojë mbi zhvillimet në këtë krizë në përshkallëzim.
Komente