“Forbes”: Arkitektët e famshëm riformatojnë Tiranën – Vizioni i Edi Ramës që po ndryshon fytyrën e kryeqytetit

Tiranë – Revista prestigjioze “Forbes” i ka kushtuar një artikull të gjatë vizionit arkitektonik që po riformëson kryeqytetin e Shqipërisë, duke e cilësuar Tiranën si një mjedis urban pionier dhe ndër më emocionuesit në Evropë sot. Në qendër të kësaj transformimi është kryeministri Edi Rama, i cilësuar si “njeriu që po e vendos Shqipërinë në hartën globale të arkitekturës”.

Sipas artikullit të shkruar nga Zoë Dare Hall, një grup i përzgjedhur arkitektësh ndërkombëtarë, të ftuar personalisht nga Rama, po i japin Tiranës një identitet të ri kulturor dhe urban, përmes ndërtimeve të guximshme dhe eksperimentale. Ndër këto ndërtime përfshihen:
“Skënderbeu Tower” që i ngjan një koke gjigante
“Downtown One Tirana” me fasadën e saj në formë harte të Shqipërisë
“Puzzle Tirana” dhe “Hora Vertikali”, projekte arkitekturore të stilit avangard
“Pylli Vertikal” i Stefano Boeri, i mbuluar me mijëra bimë e pemë

Transformimi arkitektonik po ndodh kryesisht përgjatë Bulevardit të Ri, një zonë e re urbane ku po ndërtohen qendra biznesi, hotele luksoze dhe apartamente të nivelit të lartë.

“Për arkitektët, Tirana ofron një kanavacë të bardhë për imagjinatën e tyre,” thotë Michal Kristof, themelues i studios CHYBIK + KRISTOF, fitues i një konkursi ndërkombëtar në Tiranë.

Ky zhvillim ka ndikuar edhe në tregun e pasurive të paluajtshme, i cili ka parë një rritje të çmimeve të apartamenteve nga 3,000 në mbi 10,000 euro për metër katror në disa ndërtesa. Investitorët e hershëm, sipas “Forbes”, kanë filluar të refuzojnë oferta të majme, ndërsa kërkesa rritet dita-ditës.

Për Ramen, ky projekt është më shumë sesa ndërtim fizik – është një ripërcaktim i identitetit të Shqipërisë përmes arkitekturës dhe hapësirës publike. Arkitektët e huaj nuk vijnë thjesht si vizitorë, por si pjesë e një eksperimenti të përbashkët që ndërthur traditën, krizën, klimën dhe historinë.

“Po ndërtojmë jo thjesht struktura betoni, por hapësira kuptimi. Jo monumente të gurta, por kocka mirëkuptimi,” – deklaron Rama, me gjuhë që “Forbes” e cilëson poetike dhe me vizion.

Sipas ekspertëve të fushës, 10 vitet e ardhshme pritet të jenë vendimtare për modelin urban dhe identitetin vizual të kryeqytetit shqiptar, që nga izolimi i dikurshëm i Shqipërisë nën diktaturë, po hapet sot ndaj botës përmes guximit, dizajnit dhe përfshirjes ndërkombëtare.