Flamurtari po përgatitet të rikthehet në Superligë me një stadium tërësisht të rinovuar dhe me synime të larta për këtë sezon. Drejtori i klubit, Alfred Ferko, ka konfirmuar se nga dita e nesërme do të nisë vendosja e stolave të rinj në të gjithë hapësirën e stadiumit, instalimi i ndriçimit LED, si dhe vendosja e tabelave elektronike në anët e fushës.
Rinovimi përfshin edhe punime të tjera, mes tyre vendosjen e një tapeti natyral të ri, me qëllim që gjithçka të jetë gati deri më 30 gusht, kur Flamurtari do të presë në shtëpi ekipin e Bylisit në kampionat.
Ferko ka theksuar gjithashtu se merkato po vijon dhe shumë shpejt do të zyrtarizohen emrat e lojtarëve të rinj që do t’i bashkohen skuadrës vlonjate.
Kampionati nis më 23 gusht, me Flamurtarin që do të luajë në transfertë ndaj Elbasanit në ndeshjen e parë të sezonit. Synimet e klubit për këtë vit janë ambicioze dhe skuadra pritet të jetë e përforcuar si në fushë ashtu edhe në infrastrukturë.
Elton Nika është gazetar i njohur nga Vlora, me një karrierë të gjatë në raportimin e lajmeve lokale dhe kombëtare. Aktualisht, ai kontribuon në Blu TV me kronika nga terreni dhe emisione informuese.
Komente