Vlorë, 27 Prill 2025 – Në orët e para të mëngjesit, rreth orës 01:00, një situatë emergjente detare mobilizoi autoritetet në gjirin e Vlorës. Kroçera turistike AIDA Blu, e cila po lundronte pranë brigjeve të Karaburunit, lëshoi sinjal alarmi për një emergjencë mjekësore në bord.
Në një koordinim të shpejtë dhe efikas, Qendra NdërOperacionale Detare, në bashkëpunim me Rojën Bregdetare, Kapitenerinë e Portit të Vlorës dhe Policinë Kufitare, organizuan operacionin e ndihmës për të shpëtuar jetën e pasagjeres.
Bëhet fjalë për një shtetase gjermane, 61 vjeçe, e cila kishte nevojë të menjëhershme për ndërhyrje mjekësore. Ajo u evakuua nga kroçera dhe u transportua në breg përmes një mjeti detar të specializuar, duke u shoqëruar më pas me ambulancë drejt Spitalit Rajonal të Vlorës.
Falë ndërhyrjes së shpejtë të ekipeve të shpëtimit dhe profesionalizmit të strukturave tona detare, pasagjerja mori ndihmën e parë të nevojshme dhe ndodhet nën kujdesin e mjekëve.
Blu Televizion do të vijojë të ndjekë nga afër gjendjen shëndetësore të turistes dhe do t'ju mbajë të informuar për çdo zhvillim të mëtejshëm.
Komente