Ish-drejtuesi i Bankës së Anglisë, Mark Carney, është zgjedhur Kryeministri i ri i Kanadasë pas fitores në zgjedhjet e parakohshme. Ai kishte marrë detyrën që në muajin e kaluar, pas dorëheqjes së Justin Trudeau dhe mbajtjes së një gare të shpejtë brenda Partisë Liberale, ku fitoi me lehtësi.
Carney njihet si një menaxher i shquar i krizave ekonomike, duke udhëhequr Kanadanë gjatë krizës financiare të vitit 2008 si Guvernator i Bankës së Kanadasë, përpara se të bëhej personi i parë jo-britanik që drejtonte Bankën e Anglisë.
Në fushatë, ai theksoi eksperiencën e tij globale si armë për të përballuar sfidat ekonomike dhe tregtare, sidomos përballë Presidentit amerikan Donald Trump, i cili ka nisur një luftë tregtare kundër Kanadasë.
Jeta e hershme dhe edukimi
I lindur në qytetin verior Fort Smith, në Territoret Veriperëndimore, Carney ka origjinë irlandeze dhe zotëronte më parë edhe shtetësi britanike, nga e cila ka shprehur dëshirën të heqë dorë për t’u përkushtuar si kanadez i vetëm.
Biri i një drejtori shkolle, ai studioi në Harvard me bursë dhe më pas përfundoi doktoraturën në ekonomi në Universitetin e Oksfordit, me një fokus në konkurrencën ekonomike. Ish-mentorja e tij e doktoraturës, Meg Meyer, e ka përshkruar si një mendje të gjithanshme dhe të përgatitur për kohë të trazuara.
Karriera profesionale
Pas një periudhe në sektorin privat, në 2003 Carney u bashkua me Bankën e Kanadasë, ku në 2007 u emërua guvernator. Nën drejtimin e tij, Kanadaja shmangu pasojat më të rënda të krizës globale falë politikave të normave të ulëta të interesit.
Në Bankën e Anglisë, ai modernizoi institucionin dhe ndërmori masa të guximshme në përgjigje të krizave si referendumi i pavarësisë së Skocisë dhe Brexit. Veçanërisht gjatë krizës së Covid-19, në 2020, ai ndërmori hapa të shpejtë për të mbështetur ekonominë përmes uljes së normave të interesit dhe programit të lehtësimit sasior.
Përballja me Trump-in
Eksperienca e tij ndërkombëtare i dha Carney-t përgatitjen për të përballuar sfidat me Donald Trump-in. Ai ka qenë një figurë kyçe në koordinimin global financiar përmes Bordit për Stabilitetin Financiar dhe një pjesëmarrës i rregullt në takimet e G20-s.
Në komentet e tij të fundit, Carney ka treguar më pak diplomaci ndaj Trump-it, duke e krahasuar me personazhin negativ të Harry Potter-it, Voldemort, në përgjigje të sugjerimeve për aneksimin e Kanadasë si “shteti i 51-të” amerikan.
Carney ka deklaruar se Kanadaja do të vazhdojë të vendosë kundër-tarifa derisa të sigurojë respekt dhe marrëveshje të ndershme tregtare nga SHBA.
Ambiciet politike
Fillimisht skeptik ndaj politikës – madje dikur e kishte krahasuar veten me “një klloun cirku” – Carney ndryshoi mendje pas krizës së fundit brenda Partisë Liberale dhe dorëheqjes së Trudeau-s.
Ai fitoi me diferencë drejtimin e partisë dhe më pas zgjedhjet, duke theksuar aftësitë e tij në menaxhimin e krizave dhe nevojën për përvojë në përballjen me sfidat ekonomike dhe tregtare.
Përkundër akuzave të konservatorëve për çështje të mundshme konflikti interesi gjatë kohës në sektorin privat, Carney ka deklaruar se ka ndjekur të gjitha rregullat, duke vendosur pasuritë e tij në një “trust të verbër”.
Cilat janë qëndrimet e Mark Carney-t?
• Mjedisi dhe Klima: Ish-i dërguar special i OKB-së për klimën, ai ka themeluar Aleancën Financiare të Glasgout për Net-Zero.
• Taksa e karbonit: Edhe pse më parë e ka mbështetur, sapo është betuar si Kryeministër, anuloi taksën e karbonit për të ndihmuar kanadezët që përballen me vështirësi ekonomike.
• Energjia: Ai propozon që Kanadaja të bëhet një “superfuqi e energjisë së pastër”, duke lehtësuar miratimet për projektet madhore energjetike.
• Emigracioni: Carney mbështet vendosjen e një kufiri të ri për të shmangur stresimin e sistemeve të banimit dhe shëndetësisë.
• Ekonomia: Prioriteti i tij kryesor do të jetë rritja ekonomike e Kanadasë në një klimë sfiduese globale.
Mark Carney hyn në këtë post me një përvojë të pasur, një pragmatizëm të theksuar dhe një mision të qartë për të ruajtur pavarësinë dhe mirëqenien ekonomike të Kanadasë në një kohë të trazuar.
Komente