Në kryeqytetin e Koresë së Jugut, problemi i izolimit social po rritet gjithnjë e më shumë. Që prej marsit, qyteti i Seulit ka nisur projektin “dyqanet me zemër të ngrohtë”. Këto hapësira kanë si qëllim t’i rikthejnë personat e vetmuar në jetën shoqërore, duke u ofruar vakte të ngrohta falas, biseda dhe mundësi për pushim. Fillimisht, pritej që gjatë vitit të parë të vizitoheshin nga rreth 5,000 persona, por brenda vetëm disa muajsh, numri e kaloi shifrën 20,000.
Në degën e rrethit Dongdaemun çdo ditë hyjnë mesatarisht 70–80 vizitorë. Sipas një studimi të vitit 2022, rreth 130,000 të rinj të moshës 19–39 vjeç në Seul vuajnë nga izolimi social. “Dyqanet me zemër të ngrohtë” krijojnë një atmosferë të ngrohtë, si në shtëpi: shikim filmash, relaks në karrige masazhi dhe mundësinë për të përgatitur ramen të ngrohtë.
Ekspertët theksojnë se numri i “vdekjeve nga vetmia” në Korenë e Jugut është në rritje. Organizatorët e projektit zgjodhën termin “dyqan” për ta dalluar nga një qendër ndihme psikologjike, duke qenë se në shoqërinë koreane ende ekziston stigma për të kërkuar ndihmë të tillë.
Këto hapësira nuk janë vetëm vende për komunikim por ofrojnë edhe kushte të rehatshme në stinët e ftohta dhe të nxehta për personat me të ardhura të ulëta. Sipas autoriteteve, ato ndihmojnë njerëzit të kapërcejnë ndjenjën e vetmisë dhe të rikthejnë lidhjen e tyre me shoqërinë.
Komente