Dredha ndërhyn për lidhjen e binjakëzimit mes qytetit të Vlorës dhe atij të Beneventos

Nga Carmela Pagliuca

Lajmi për binjakëzimin mes qytetit të Vlorës dhe atij të Beneventos po qarkullon me shpejtësi në rrjet dhe ka mbërritur edhe te kryetari i bashkisë së Vlorës, Ermal Dredha, i cili na dha një intervistë në lidhje me këtë iniciativë.

"Jam shumë i lumtur që po nisim këtë rrugëtim që do të lidhë zyrtarisht dy qytetet tona," u shpreh Dredha.

Gjatë deklaratës së tij, kryebashkiaku theksoi se kjo bashkëpunim do të mund të shtrihet në shumë fusha. “Po përgatitemi për një bashkëpunim që mund të përfshijë shumë aspekte. Eksperienca e qytetit të Beneventos mund të na japë drejtime të vlefshme në fusha ku jemi ende në fillimet tona”, tha ai.

Ndër fushat që përmendi janë: shërbimet ndaj komunitetit, menaxhimi i emergjencave civile, sistemi bibliotekar, kinemaja, mirëmbajtja e hapësirave urbane dhe menaxhimi i parkimeve.

Ai nuk la pa përmendur as sportin, duke vlerësuar mundësinë e shkëmbimit mes ekipeve të futbollit, Flamurtari dhe Benevento, të cilët përfaqësojnë me krenari qytetet e tyre.
“Jam i bindur se të dyja palët do të jenë në gjendje të shkëmbejnë përvojat e tyre në të mirë të komuniteteve që përfaqësojnë”, shtoi ai.

Në lidhje me propozimin e kryetarit të Bashkisë së Beneventos, Clemente Mastella, për aktivitetet kulturore që do të përfshinin studentët e shkollave të mesme dhe universiteteve në programe të përbashkëta formimi, Dredha u shpreh:
"Jam pro idesë për të ndërtuar programe të përbashkëta formimi mes studentëve shqiptarë dhe italianë. Investimi në kulturën e brezave të rinj përfaqëson një mundësi konkrete për rritjen e të dy qyteteve."