Dita Botërore Kundër Punës së Fëmijëve – 160 milionë fëmijë të angazhuar në punë në mbarë botën

12 qershor – Sot shënohet Dita Botërore Kundër Punës së Fëmijëve, një ditë ndërkombëtare që synon të rrisë ndërgjegjësimin për një nga problemet më të rënda të të drejtave të fëmijëve në botë. Kjo ditë kujton përpjekjen globale për të çrrënjosur punën e fëmijëve dhe për të garantuar një fëmijëri të lirë, të sigurt dhe të edukuar për çdo fëmijë.

Sipas të dhënave të fundit, rreth 160 milionë fëmijë në mbarë botën janë të angazhuar në punë – një në çdo dhjetë fëmijë. Më shumë se 79 milionë prej tyre kryejnë punë të rrezikshme, që dëmtojnë drejtpërdrejt shëndetin, zhvillimin dhe të drejtën e tyre për arsimim dhe lojë. Ndër këta, 97 milionë janë djem dhe 63 milionë janë vajza.

Standardet ndërkombëtare e përkufizojnë punën e fëmijëve si çdo aktivitet që ndërhyn në të drejtën e fëmijës për edukim, e mbingarkon fizikisht dhe emocionalisht dhe që shpesh kryhet nga fëmijë të vegjël në moshë.

Pavarësisht përparimeve të shënuara që nga viti 2000, në vitet e fundit situata është përkeqësuar për shkak të konflikteve të armatosura, krizave ekonomike dhe pasojave të pandemisë COVID-19, të cilat kanë rritur varfërinë dhe kanë detyruar miliona fëmijë të braktisin shkollën për të punuar.

Shpërndarja globale e fëmijëve që punojnë:

Afrika: 72 milionë

Azia dhe Paqësori: 62 milionë

Amerika Latine dhe Karaibet: 11 milionë

Evropa dhe Azia Qendrore: 6 milionë

Vendet Arabe: 1 milion

Organizatat ndërkombëtare theksojnë se rritja ekonomike e deritanishme nuk ka qenë as e mjaftueshme dhe as gjithëpërfshirëse për të adresuar nevojat bazë të familjeve në nevojë, të cilat shpesh detyrohen të përdorin punën e fëmijëve si mjet mbijetese.

Në këtë ditë, apeli është i qartë: të gjithë aktorët – qeveritë, shoqëria civile, bizneset dhe komunitetet – duhet të bashkohen në përpjekjen për t’i dhënë fund një fenomeni që mohon fëmijëve të drejtën themelore për një fëmijëri të denjë.