Dietat me shumë proteina mund të rrisin rrezikun e kancerit – Ja sa duhet të konsumoni në çdo moshë

Një trend që po qarkullon masivisht në rrjetet sociale, sidomos mes grave, për të dyfishuar sasinë ditore të proteinave, po paralajmërohet nga mjekët si potencialisht i rrezikshëm për shëndetin. Sipas ekspertëve, dieta me përmbajtje të lartë proteinash – sidomos nga burime shtazore – lidhet me rrezik më të lartë të kancerit dhe vdekshmërisë së parakohshme.

Shumë influencuese, veçanërisht ato që i drejtohen grave në periudhën e menopauzës, rekomandojnë 130–150 gramë proteina në ditë, duke pretenduar se kjo mbron muskujt dhe kockat. Por sipas Dr. Federica Amati, nga ekipi i aplikacionit ushqimor ZOE, kjo qasje është e gabuar.

“Gjatë menopauzës, gratë kanë rrezik më të lartë për osteoporozë dhe humbje mase muskulore, por thjesht rritja e proteinave nuk e zgjidh këtë problem. Përkundrazi, studimet tregojnë se konsumimi i lartë i proteinave pas moshës 50 vjeç mund të rrisë ndjeshëm rrezikun e kancerit,” shpjegon ajo.

Një studim i vitit 2014 nga Universiteti i Kalifornisë Jugore, me mbi 6,000 të rritur mbi 50 vjeç, gjeti se ata që konsumonin sasi të larta proteinash (20% e kalorive totale) kishin katër herë më shumë gjasa të vdisnin nga kanceri, krahasuar me ata që ndiqnin një dietë me pak proteina.

Sipas Dr. Amati, shkaku lidhet me stimulimin e tepruar të një procesi qelizor që nxit rritjen – mekanizëm që, në rastin e kancerit, përshpejton shumimin e qelizave tumorale. Rreziku shtohet kur proteinat vijnë kryesisht nga burime shtazore, të cilat përmbajnë aminoacide të lidhura me sëmundje kardiovaskulare, dëmtim të qelizave, sëmundje neurodegjenerative dhe kancer.

Sa proteina duhen konsumuar?
Udhëzimet britanike rekomandojnë rreth 0.75 g proteina për kg peshë trupore – për një grua mesatare 72 kg kjo përkthehet në rreth 54 g në ditë. Dr. Amati sugjeron pak më shumë për gratë në moshë të mesme, 1.2–1.4 g për kg, por thekson se kjo është ende lehtësisht e arritshme pa e tepruar.

Një fileto pule 150 g përmban rreth 36 g proteina, një vezë 6 g, një kos grek 170 g deri në 20 g, ndërsa një porcion fasulesh 7–10 g.

Ekspertja këshillon të zëvendësohet sa më shumë proteina shtazore me burime bimore si fasulet, bizelet, arrat, farat dhe tërshëra, të cilat përveç proteinës ofrojnë edhe fibra të dobishme për shëndetin.