Delvina po përballet me një nga skenarët më të rrezikshëm të viteve të fundit, teksa një zjarr i fuqishëm po përparon me shpejtësi drejt puseve të naftës, duke kërcënuar depot e kondensatit dhe impiantet industriale në zonë. Era e fortë po ushqen flakët dhe rreziku për një shpërthim me pasoja katastrofike për qytetin dhe zonat përreth mbetet i lartë.
Evakuimi dhe zhvendosja e spitalit
Autoritetet kanë nisur menjëherë evakuimin e banorëve nga lagjet dhe fshatrat pranë puseve. Pamjet tregojnë familje që largohen me nxitim, duke marrë vetëm sendet më të domosdoshme.
Në një masë urgjente, Spitali i Delvinës është zhvendosur pranë Pallatit të Kulturës, ku vijon ofrimin e shërbimeve në kushte emergjence. Ambulanca të shumta janë në gatishmëri për transportimin e të plagosurve ose personave të prekur nga tymi i dendur.
Forcat në terren
Në vendngjarje janë angazhuar zjarrfikës nga Delvina, Saranda, Finiqi dhe bashki të tjera, të pajisur me mjete të specializuara. Në ndihmë kanë mbërritur njësi të ushtrisë dhe policisë, për të përforcuar vijën mbrojtëse dhe për të parandaluar depërtimin e flakëve në zonën industriale.
Operacioni është i vështirësuar nga terreni i thyer, temperaturat e larta dhe ndryshimet e papritura të erës, që shpesh ndihmojnë përhapjen e flakëve në fusha e kodra të reja. Vullnetarë dhe banorë po ndihmojnë me mjete të improvizuara për të frenuar zjarrin.
Rreziku i shpërthimit
Ekspertët paralajmërojnë se, nëse flakët arrijnë depot e kondensatit ose puset e naftës, pasojat mund të jenë fatale për një zonë të gjerë, duke shkaktuar dëme materiale kolosale dhe ndotje të rëndë të ajrit e tokës.
Qyteti nën alarm
Delvina ndodhet nën tingujt e sirenave të emergjencës. Rrugët janë të bllokuara, forca të shumta policie po koordinojnë evakuimin, ndërsa tymi i zi mbulon horizontin dhe dielli është zbehur nga re të dendura tymi.
Blu TV ndodhet në terren dhe do të vijojë raportimin në kohë reale për këtë situatë kritike.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente