Trajneri legjendar i Real Madridit, Carlo Ancelotti, është pranë një kapitulli të ri në karrierën e tij – këtë herë jo në një klub evropian, por në krye të kombëtares më të lavdishme në historinë e futbollit: Brazilit.
Sipas burimeve të shumta ndërkombëtare si The Athletic, Sky Sports dhe gazetari i mirënjohur Fabrizio Romano, Ancelotti ua ka komunikuar tashmë lojtarëve të Madridit në dhomën e zhveshjes vendimin për t'u larguar në fund të sezonit. Ai pritet të marrë drejtimin e Brazilit në qershor, në ndeshjet e radhës ndërkombëtare, duke u bërë trajneri i parë jo-brazilian që udhëheq Seleçaon në më shumë se gjysmë shekulli.
Kjo lëvizje e rëndësishme nënkupton se Ancelotti nuk do të jetë më në pankinën e Madridit për Kupën e Botës për Klube, që zhvillohet në SHBA nga 14 qershori deri më 13 korrik. Gazeta "Marca" ka raportuar se marrëveshjet verbale janë bërë – mungon vetëm firma.
Edhe pse ka kontratë me Realin deri në vitin 2026, eliminimi i hershëm nga Champions League dhe humbja në finalen e Kupës së Mbretit kundër Barcelonës kanë tensionuar pozitat e tij, duke e bërë largimin më të lehtë dhe të pranueshëm për të dyja palët.
Në horizontin e Madridit ka një emër të njohur që po vjen me forcë: Xabi Alonso, aktualisht trajner i Bayer Leverkusen dhe fitues i titullit në Bundesligë këtë sezon. Ish-mesfushori i Madridit është përfolur gjerësisht si pasardhësi i Ancelottit, duke përfaqësuar një kthim emocionues në "Santiago Bernabeu", kësaj radhe si trajner.
Për momentin, Real Madrid është i dyti në renditjen e La Ligës, katër pikë pas Barcelonës, të cilën do ta presë më 11 maj në një "El Clásico" me rëndësi vendimtare për titullin.
A do të mundet Ancelotti të largohet me kokën lart dhe një trofe në dorë? Apo do të jetë një lamtumirë e zbehur për trajnerin që solli dy Champions në Madrid?
Komente