Pas sulmeve ajrore të Izraelit ndaj Iranit, reagimet nga e gjithë bota kanë qenë të menjëhershme, duke reflektuar shqetësimin për përshkallëzimin e krizës në Lindjen e Mesme dhe rrezikun që ajo përbën për stabilitetin global.
Shtetet e Bashkuara u shprehën se nuk janë të përfshira në sulmet ajrore. Sekretari i Shtetit, Marco Rubio, deklaroi se “prioriteti ynë është mbrojtja e forcave amerikane në rajon”.
Britania përmes kryeministrit Keir Starmer bëri thirrje për uljen e tensioneve dhe theksoi se “stabiliteti në Lindjen e Mesme duhet të jetë përparësi”.
Arabia Saudite dënoi ashpër sulmin, duke e quajtur një “agresion flagrant” që shkel sovranitetin e Iranit dhe normat ndërkombëtare.
Libani, përmes Presidentit Joseph Aoun dhe Kryeministrit Nawaf Salam, e konsideroi veprimin e Izraelit një pengesë serioze ndaj përpjekjeve për paqe në rajon dhe një shkelje flagrante të të drejtës ndërkombëtare.
India deklaroi se po ndjek me vëmendje situatën dhe u bëri thirrje palëve të shmangin përshkallëzimin. Delhi përmendi marrëdhëniet e ngushta që ka me të dyja vendet.
Omani e cilësoi sulmin si një përshkallëzim të rrezikshëm dhe një shkelje të Kartës së Kombeve të Bashkuara.
Pakistani shprehu solidaritet me popullin e Iranit dhe e dënoi ashpër sulmin, duke theksuar se ai shkel hapur normat e ligjit ndërkombëtar.
Katari i bëri thirrje bashkësisë ndërkombëtare të ndalojë shkeljet e Izraelit dhe të parandalojë përshkallëzimin e mëtejshëm.
Emiratet e Bashkuara Arabe kërkuan nga Këshilli i Sigurimit i OKB-së të ndërhyjë menjëherë për arritjen e një armëpushimi.
Kina, përmes ambasadës së saj në Teheran, e quajti situatën "të rëndë dhe komplekse", duke u bërë thirrje qytetarëve të saj të marrin masa sigurie.
Zelanda e Re paralajmëroi për rrezikun e llogaritjeve të gabuara, ndërsa Australia tha se ishte “e alarmuar” dhe kërkoi dialog e diplomaci, për të shmangur destabilizimin e mëtejshëm të rajonit.
Reagimet e forta dhe të koordinuara nga vende të ndryshme tregojnë shqetësimin global për pasojat e një konflikti të mundshëm të gjerë. Diplomacia ndërkombëtare pritet të intensifikohet në përpjekje për të shmangur një përplasje më të madhe në një rajon që tashmë mbart ngarkesë të lartë tensioni.
Armandi Xhelilaj është gazetar me përvojë të gjatë në median vizive dhe të shkruar, me fokus në raportimin nga terreni dhe trajtimin e problematikave sociale e komunitare. Me një formim akademik në Gazetari-Komunikim dhe eksperiencë në televizione ai ka dëshmuar profesionalizëm dhe angazhim të vazhdueshëm në fushën e informimit.
Komente