Një ngjarje tragjike është shënuar në qytetin e Beratit, ku një punëtor ndërtimi ka humbur jetën pasi dyshohet se është rrëzuar nga kati i tretë i një pallati në ndërtim. Viktima është identifikuar si shtetasi R. H., ndërsa ngjarja ndodhi pasditen e djeshme në një kantier ndërtimi.
Pas verifikimeve të kryera nga shërbimet e Komisariatit të Policisë Berat, dyshohet se ngjarja ka ndodhur për shkak të mungesës së masave të sigurisë në vendin e punës.
Në përfundim të hetimeve paraprake, policia ka shpallur në kërkim administratorin e firmës ndërtuese, shtetasin T. N., 65 vjeç, ndërsa ka nisur procedim penal në gjendje të lirë për teknikun e ndërtimit, shtetasin S. B., 69 vjeç. Të dy akuzohen për veprën penale “Shkelja e rregullave të mbrojtjes në punë”.
Policia e Beratit vijon punën për kapjen e administratorit të firmës dhe për zbardhjen e plotë të rrethanave të ngjarjes.
Ngjarja rikthen në vëmendje problemet e sigurisë në sektorin e ndërtimit, ku shpesh punonjësit përballen me rreziqe serioze për shkak të mungesës së standardeve të duhura të mbrojtjes në vendin e punës.
Komente