Londër | Blu TV – Një betejë e ashpër po zhvillohet në brigjet dhe ujërat e Britanisë mes forcave speciale dhe rrjeteve ndërkombëtare të trafikut të drogës. Anije të mëdha të quajtura “mother ships”, të ngarkuara me tonelata kokainë, qarkullojnë në ujërat britanike duke përdorur metoda gjithnjë e më të sofistikuara për të shmangur kontrollin e autoriteteve.
Sipas Agjencisë Kombëtare të Krimit (NCA), kartelët nga Amerika e Jugut ngarkojnë kontejnerë me kokainë në anije tregtare që vijnë drejt Europës. Pasi afrohen në ujërat britanike, ata hedhin në det balestra me kokainë të pajisura me pajisje lundruese dhe GPS, të cilat më pas mblidhen nga skafe të vegjël të kontrabandistëve lokalë.
Aksione spektakolare në det
Në një operacion të fundit në Detin Irlandez, forcat speciale irlandeze zbritën me helikopter mbi një anije të dyshuar, ku sekuestruan më shumë se 2 ton kokainë me vlerë mbi 132 milionë paund – kapja më e madhe në historinë e Irlandës.
Gjithashtu, në brigjet e Cornwall, katër persona u dënuan me gjithsej 82 vjet burg, pasi tentuan të transportonin drogë nga deti drejt tokës, duke ndjekur metodën e njohur si “drop-off në det” (ASDO).
Një metodë gjithnjë e më e zakonshme
NCA ka nisur mbi 60 hetime për raste të kësaj metode vetëm gjatë vitit të kaluar, duke konfiskuar afro pesë tonë kokainë dhe duke arrestuar 34 persona.
Gjatë këtyre operacioneve, janë zbuluar raste ku kontrabandistët kishin përdorur anëtarë të korruptuar të ekuipazhit apo pasagjerë të fshehtë për të hedhur drogën në ujë, ndërsa bregdeti britanik me mbi 11 mijë milje vijë bregdetare ofron mjaftueshëm zona të izoluara për zbarkim.
Teknologji dhe raste të rrezikshme
Kartelët përdorin pajisje moderne si Apple AirTags për të ndjekur pakot me kokainë në det. Por shpeshherë, pakot e hedhura, qoftë gjatë motit të keq apo për të shmangur arrestimin, përfundojnë të lëna në det dhe më pas dalin në sipërfaqe në plazhe publike në Cornwall, Sussex apo Isle of Wight.
Një nga ndihmësit e pazëvendësueshëm të operacioneve është edhe qeni nuhatës Flash, i cili në janar ndihmoi në zbulimin e një ngarkese prej 50 milionë paund kokainë të fshehur mes bananeve.
Thirrje për vigjilencë
Autoritetet britanike u bëjnë thirrje komuniteteve bregdetare të raportojnë çdo lëvizje të dyshimtë në plazhe, limane apo dete të hapura, pasi bashkëpunimi i qytetarëve është thelbësor për frenimin e trafikut ndërkombëtar të drogës.
“Kriminelët mund të përpiqen të fshihen, por ne jemi gjithnjë një hap përpara,” tha Duncan Capps nga Border Force. “Ne do të vijojmë të çmontojmë këto rrjete kriminale në bashkëpunim të ngushtë me partnerët tanë ndërkombëtarë.”
Komente