Amerikanët festojnë Ditën e Pavarësisë – 249 vite nga shkëputja e kolonive nga Anglia

Shtetet e Bashkuara të Amerikës festojnë sot 4 Korrikun, Ditën e Pavarësisë, një nga datat më të rëndësishme historike për kombin amerikan. Më 4 korrik 1776, 13 kolonitë britanike në Amerikën e Veriut shpallën pavarësinë nga Mbretëria e Bashkuar përmes ratifikimit të Deklaratës së Pavarësisë.

Ky dokument historik, i përpiluar kryesisht nga Thomas Jefferson dhe i miratuar nga Kongresi i Dytë Kontinental, shënoi lindjen e një kombi të ri – Shtetet e Bashkuara të Amerikës – të bazuar mbi idealet e lirisë, vetëqeverisjes dhe barazisë.

Pse 4 Korriku?
Edhe pse Kongresi kishte votuar për pavarësi më 2 korrik 1776, miratimi zyrtar dhe publikimi i Deklaratës ndodhi më 4 korrik, datë që më pas u bë simbol i lirisë amerikane. John Adams, një nga “etërit themelues” dhe president i ardhshëm, shkroi në një letër drejtuar gruas së tij Abigail:

“2 korriku 1776 do të jetë një datë e paharrueshme në historinë e Amerikës... Duhet të festohet me pompë dhe madhështi, me parada, fishekzjarrë dhe ndriçime – nga njëri cep i këtij kontinenti në tjetrin, përgjithmonë.”

Simbolet e festës
249 vite më pas, amerikanët e nderojnë këtë ditë me festime madhështore në çdo shtet të vendit. Fishekzjarrët, paradat, koncertet, ushqimet tradicionale dhe aktivitetet familjare janë pjesë e pandarë e atmosferës festive.

Dita e Pavarësisë njihet ndryshe si “dita e fishekzjarrëve”, ndërsa mijëra komunitete në gjithë SHBA organizojnë shfaqje shumëngjyrëshe për të kremtuar lirinë dhe historinë e tyre. Njëkohësisht, autoritetet vendore dhe federale marrin masa të rrepta sigurie për të garantuar zhvillimin pa incidente të festimeve.

Kushtetuta amerikane
Pas shpalljes së pavarësisë, në vitin 1787, u nënshkrua Kushtetuta e Shteteve të Bashkuara – dokumenti themelor që përcaktoi ndarjen e pushteteve në tre degë: ekzekutive (Presidenti), legjislative (Kongresi) dhe gjyqësore (Gjykata e Lartë).

Për SHBA-të, 4 Korriku është më shumë se një festë – është kujtesa e një ideali që formësoi një komb. Shqipëria, si aleate dhe partnere strategjike e Amerikës, përcjell urimet më të përzemërta në këtë ditë simbol të lirisë dhe demokracisë.