Rritet numri i të rinjve me sëmundje të zemrës në Vlorë – Kardiologët: “Zemra nuk fal, kujdesuni që herët”

Një shqetësim serioz po evidentohet në Vlorë: sëmundjet kardiovaskulare nuk janë më vetëm problem i moshës së tretë, por po prekin gjithnjë e më shumë moshat e reja.

Në një intervistë për Blu TV, mjekja kardiologe Suela Spahiu nga Poliklinika e Specialiteteve në Vlorë, shprehet se numri i vizitave për probleme me zemrën është në rritje të ndjeshme, dhe një pjesë e konsiderueshme e pacientëve janë të rinj nën moshën 40 vjeç.

“Çdo ditë në shërbimin tonë paraqiten dhjetëra qytetarë me ankesa të ndryshme kardiake. Ajo që na shqetëson është fakti se po rritet ndjeshëm numri i të rinjve me probleme serioze të zemrës”, u shpreh kardiologia Spahiu.

Sipas saj, faktorët kryesorë që ndikojnë në këtë rritje alarmante janë:

Mënyra e jetesës sedentare

Ushqyerja e pashëndetshme dhe e pakontrolluar

Stresi i përditshëm

Përdorimi i substancave si duhani dhe alkooli

Trashëgimia familjare

Kardiologia i bën një apel të fortë të rinjve: “Zemra nuk fal”, ndaj kujdesi për të duhet të nisë herët. Ajo thekson rëndësinë e kontrolleve të rregullta, të mosneglizhimit të simptomave si lodhja, marramendja, ose dhimbjet në gjoks, dhe domosdoshmërinë për t’iu drejtuar mjekut specialist sa herë ndihen shqetësime.

“Asnjë simptomë nuk është e vogël kur bëhet fjalë për zemrën”, thotë Spahiu, duke shtuar se ndërgjegjësimi dhe parandalimi janë çelësi i shëndetit afatgjatë.